ତୁମେ ଗଲା ପରେ

ଜାଣି ଶୁଣି ସାଜିଛ ତୁମେ ଅଜଣା
      ମୁଁ ପାଗଳ କରିଛି ପ୍ରତୀକ୍ଷା
ତୁମ ଅଫେରନ୍ତା ବାଟ କେତେ ଦିନୁ
      ପ୍ରଲୋଭିତ ତୁମକୁ ଅପେକ୍ଷା ll

ତୁମ କଥା ଯେବେ ମନେ ପଡେ ଭାରି
      ମନ ଯାଏ ମୋ ଖୁସିରେ ଭରି
ସବୁ ଦିନ ତୁମେ ଆସୁଛ ସପନେ
      ଲାଗେ ମୋତେ ସବୁ ସତ ପରି ll

ତୁମେ ପାଖେ ଥିଲେ କଥା ବହୁ ଜମେ
       ହୃଦୟ ଏ ମନ ଏକ ମିଶେ
ତୁମକୁ ଶବ୍ଦେ ସାଉଁଟିବାକୁ ଖୋଜେ
       ମୋ ଏ କଲମ କାଗଜ ଆସେ ll

ରୂପ ଅନ୍ତରେ କାନ୍ଦି ଦୁଃଖେ ମୁଁ ମରେ
         ତୁମକୁ ନିତି ଯେ ଝୁରି ଝୁରି
କରେ ମାତ୍ର ସୁଖୀ ହେବା ଅଭିନୟ
         ହୃଦୟେ ଯାଏ ତୁମକୁ ସ୍ମରି ll

ତୁମ ଅଫେରନ୍ତା ବାଟ ମୋ ପ୍ରତୀକ୍ଷା
      ଦିଶେ ନାହିଁ କି ଅନ୍ତଃ ବେଦନା
ଜଳେ ମୁଁ ପ୍ରତି କ୍ଷଣେ ବିରହ କଷ୍ଟ
      ଶୁଭେନି ମୋ ଆକୁଳ ପ୍ରାର୍ଥନା ll

✍️ତ୍ରିନାଥ ପଟ୍ଟନାୟକ*