ଅଦୃଷ୍ଟ ଈଶ୍ୱର

ବିଶ୍ୱ ବ୍ରହ୍ମାଣ୍ଡର ବୈଭବ ଠାକୁର
ପରଂବ୍ରହ୍ମ ଜଗନ୍ନାଥ
ଚିର ଜାଗରିତ ଚିନ୍ମୟ ଚେତନା
ତୁମେ ପଞ୍ଚ ମହାଭୂତ ll

ମାଟିରୁ ଆକାଶ ଅନ୍ତୁଡ଼ିରୁ ଜୁଇ
କେବଳ ତୁମେ ହିଁ ତୁମେ
ଅଦୃଷ୍ଟ ଈଶ୍ୱର ପ୍ରଭୁ ପରାତ୍ପର
ବ୍ୟାପୀ ଅଛ ତ୍ରିଭୁବନେ ll

ତୁମ ସର୍ଜନାର ବିନ୍ଦୁଟିଏ ମାତ୍ର
କ୍ଷୁଦ୍ର ମୁଁ ଭକତ ଛାର
ଭାବନାରେ ତଵ ଉବୁଟୁବୁ ହୁଏ
ଭୁଲି ଅସ୍ତିତ୍ୱକୁ ମୋର ll

ତୁମ ଚକା ଆଖି ମୋ ଦୁଇ ଆଖିରେ
ଭରି ଦେଉ ଦିବ୍ୟ ଜ୍ୟୋତି
ସେଇ ଅନ୍ଦାଜରେ ଭିନ୍ନ ଦୃଷ୍ଟି ଢାଳି
ଦେଖିବି ଜଗତ ପ୍ରତି ll

ପ୍ରୀତି ମହ୍ଲାରରେ ପ୍ରତିଛବି ଆଙ୍କି
ଆସ ତୁମେ ସପନରେ
ସେଇ ସମ୍ମୋହନେ ସ୍ପନ୍ଦନ ଖେଳାଇ
ନାଚି ଉଠେ ସହାସ୍ୟରେ ll

ଅଲଭ୍ୟ କରୁଣା ଐଶ୍ଵରୀକ ସତ୍ତା
ପ୍ରାଣେ ପ୍ରାଣେ ଖେଳିଯାଉ
ନରଦେହ ଲଭି ନାରାୟଣ ନାମ
ଭଜି ଭଜି ଦିନ ଯାଉ ll

✍️ଗୀତାଞ୍ଜଳି ପୃଷ୍ଟି